Os atletas másters da SD Compostela Atletismo cumpriron con moito mérito na proba nacional de media maratón en ruta que tivo o domingo en Santander. Entre os mellores deportistas máster da disciplina, atopábanse varios dos nosos atletas, con moitas ganas e disposición plena de deixar as cores da Esedé no máis alto do panorama nacional. Entre os corredores máis veloces tivemos a Miguel Ángel Barral, con 1:15:17, chegando a meta entre os 200 primeiros. Moi preto del, chegaron Marcelo Lanza (1:17:27), José Antonio Gontán (1:17:44), Amador Pena (1:17:49) e Pedro Pazos (1:28:13). Entre as atletas féminas da entidade branquiazul; Julia Vaquero foi quen de rematar en 1:34:24, seguida de Vicky Gonzalez (1:47:16) e Fini Riber (1:50:07). O noso Fernando González, que tomou parte da saída, tivo que abandoar no transcurso da carreira.

Xa en terras galegas; foron poucas as probas que se sucederon na pasada fin de semana, pero contamos con representantes en case todas elas.

Na Media Maratón de Lugo, un clásico para os apaixonados dos 21 quilómetros , Martina Gestal foi 4a absoluta e 2a da categoria VET1 con 1:30:49; e Daniel García parou o crono en 1:27:05 (MMP).

Valeria Batire foi a única atletas do Compos na proba absoluta “11 das vías” do Concello de Cerceda, en que a nosa Sub20 foi a mellor da súa categoría e cuarta da xeral. Tamén Guillermo Llorente levou a vitoria na carreira Sub12.