Grande afluencia de atletas da SD Compostela Atletismo na Clásica Gandeira de Santa Comba, que viron premiado o seu esforzo conseguindo o trunfo por equipos na proba absoluta da 10K. O recoñecemento por equipos foi o broche de ouro a unha mañá ideal na vila do Xallás na que, tanto maiores coma pequenos, gozaron dunha fermosa carreira polas paraxes autóctonas, atravesando tres explotacións agropecuarias, baixo unha solleira mañá de primaveira.

O máis cativo dos nosos atletas, tamén o máis madrugador pois foi o primeiro en participar da proba Sub10 na mañá do domingo, foi Alex Pena que acadou o 1• posto da categoría.

En 3K tivemos a dúas das nosas atletas Máster: María Tarrío e Malena Amigo, ambas expertas no 3K logo de participar a pasada temporada nesta distancia no Circuíto da Costa da Morte. María volveu dar conta do seu bo momento físico chegando en 3ª posición cun tempazo de 11:24. A nosa Malena Amigo mantense nunha liña ascendente e logrou unha 3ª posición Máster2 con 15:39.

Cara o mediodía, chegou o pistoletazo de saída para a proba de 10K que contaba con numerosa participación compostelanista. Aos poucos quilómetros da saída, dous dos nosos atletas situáronse nos postos de cabeza, logrando manter a vantaxe ata o final: Amador Pena, que foi 2º absoluto e José Sandá, 5º da xeral e 1º Máster1. O top10 da Clásica Gandeira pechouno Emilio García (2º Máster2) seguido por Gerardo Cachafeiro (3º Sen).

Pouco a pouco foron chegando todos os atletas da Esedé que participaron na proba absoluta da Clásica Gandeira de Santa Comba. Cristian Danis (17), Manuel Castiñeiras (20), Sindo González (23), Iván Solis (37) e Roi García (57) precederon á primeira das nosas atletas femininas en atravesar a meta; Elena Veres, 2ª absoluta da clasificación feminina. Canda ela tamén completou a carreira Jesús Barral (58) e Fernando Paz (60).

Laureano Varela (75), Mencía Reborido (7, 3a Senior) Pablo Fernández (109), Nuria Mejuto (11), Juan Luis Botana (142), Fini Riber (17, 1ªMáster2), Francisco Pena (160) e María Maroñas (34) completaron a lista de participantes compostelanistas en Santa Comba.

Paralelamente á proba de Santa Comba e moi pretiño da comarca do Xallas, no Concello de Ames, desenvolvíase outra cita deportiva de gran sona entre os amantes do Trail: o Trail e Andaina Ribeiras do Tambre. Tres atletas da Esedé completaron con moito mérito os 16 quilómetros que separaban o punto de saída en Ponte Maceira e a chegada no Real Aeroclub con 635 metros de desnivel acumulado. Antonio Vázquez (27) foi 2º da categoría Máster 3 e Silvia Fernández (12) levou premio como 1ª da categoría Máster1. Tamén Fran Espiño (49) participou desta fermosa proba.

En Monforte luciron de gran maneira as cores azuis e brancas coa representación compostelanista de Marcelo Lanza e Alejandro Montero na Carreira Popular Concello de Monforte 10K. Unha carreira moi rápide e de gran esixencia que os dous atletas completaron con éxitos, pois Alejandro parou o crono en 35:28 e foi 8º Senior e Marcelo, con 35:47 foi 1º Máster50.

Metémonos de cheo nunha nova semana, esta algo especial e diferente polas festividades de Xoves Santo e Venres Santo, pero coa mente posta nas competicións que veñen: Campionato de Galicia de Trail, Narón 10K e Carreira da Pascua de Padrón, entre outras.